ရှမ်းပြည်နယ်(အရှေ့ပိုင်း) လမ်းတံတား လုပ်ငန်းများ ကြည့်ရှုစစ်ဆေး

ဆောက်လုပ်ရေးဝန်ကြီးဌာန၊ ပြည်ထောင်စုဝန်ကြီး ဦးဟန်ဇော် သည် ဌာနဆိုင်ရာ တာဝန်ရှိသူများနှင့်အတူ (၁-၁၂-၂၀၁၉)ရက် နံနက်ပိုင်းတွင် ကျိုင်းတုံ - မိုင်းခွန် - မိုင်းခုတ်လမ်း (၀)ကီလိုမီတာမှ (၄၇.၇)ကီလိုမီတာအထိ လမ်းဦးစီးဌာန၊ ကျိုင်းတုံခရိုင်မှ ကတ္တရာခင်းခြင်း၊ ကွန်ကရစ်ခင်းခြင်း၊ ကျောက်စီမြေထိန်းနံရံနှင့် ရေမြောင်းများ ဆောင်ရွက်ထားရှိမှုတို့ကို လမ်းတစ်လျှောက် ကြည့်ရှုစစ်ဆေးပြီး တာဝန်ရှိသူများအား လုပ်ငန်းလိုအပ်ချက်များ မှာကြားပါသည် ။ ထို့နောက် ကျိုင်းတုံ - မိုင်းခုတ် - မိုင်းဆတ်လမ်း (၄၇.၇)ကီလိုမီတာမှ (၁၁၅.၉၇၃)ကီလိုမီတာအထိ မိုင်းဆတ်ခရိုင်မှ လမ်းချဲ့ခြင်း ၊ ကွန်ကရစ်ခင်းခြင်း ၊ ကတ္တရာခင်းခြင်းလုပ်ငန်းများ အပိုင်းလိုက်ဆောင်ရွက်ထားရှိမှု အခြေအနေကို ကြည့်ရှုစစ်ဆေးပြီး မိုင်းလု သို့ ရောက်ရှိပါသည်။ လမ်းစခန်းရှင်းလင်းဆောင်တွင် လမ်းဦးစီးဌာန တာဝန်ရှိသူများက ရှမ်းပြည်နယ်(အရှေ့ပိုင်း)ရှိ လမ်းအခြေအနေ၊ ပြောင်းလဲသတ်မှတ်လိုသော လမ်းအခြေအနေ တို့နှင့်ပတ်သက်၍ ရှင်းလင်းတင်ပြရာ ပြည်နယ်လမ်းပန်းဆက်သွယ်ရေးဝန်ကြီး ဦးခွန်ရဲထွေးက ဖြည့်စွက်ရှင်းလင်းတင်ပြပါသည် ။ တင်ပြချက်များအပေါ် ပြည်ထောင်စုဝန်ကြီးက ခရိုင်အလိုက် လမ်းများသတ်သတ်မှတ်မှတ် ရှိစေရန်နှင့် လုပ်ငန်းဆောင်ရွက်ရာတွင် အဆင်ပြေစေရေးအတွက် ပြည်နယ်အစိုးရအဖွဲ့နှင့် ညှိနှိုင်း ဆောင်ရွက်ရန်မှာကြားပြီး လမ်းတစ်လျှောက် လမ်းချဲ့ခြင်း ၊ ကွန်ကရစ်ခင်းခြင်းနှင့် ကတ္တရာလမ်း အခြေအနေတို့ကို ကြည့်ရှုစစ်ဆေးပါသည် ။ နေ့လည်ပိုင်းတွင် မိုင်းဆတ်မြို့သို့ ရောက်ရှိပြီး ရှမ်းပြည်နယ်၊ မြို့ပြနှင့်အိမ်ရာ ဖွံ့ဖြိုးရေးဦးစီးဌာန၊ ညွှန်ကြားရေးမှူး ဦးထွန်းအောင်ကျော် က မိုင်းဆတ်မြို့တွင် ၄ ခန်းတွဲ ၄ ထပ် စုပေါင်းဝန်ထမ်းအိမ်ရာ ဆောက်လုပ်ပြီးစီးမှုနှင့်ပတ်သက်၍ ရှင်းလင်းတင်ပြရာ တည်ဆောက်ရေးလုပ်ငန်းများ လက်ရာသေသပ် ကောင်းမွန်စေရန်နှင့် အရည်အသွေးကောင်းရန် လမ်းညွှန်မှာကြားကာ တည်ဆောက်ပြီး စုပေါင်းဝန်ထမ်းအိမ်ရာတို့ကို ကြည့်ရှုစစ်ဆေးခဲ့ပါသည် ။ ၄င်းနောက် မွန်းလွဲပိုင်းတွင် မိုင်းဆတ်ခရိုင်မှ ဆောင်ရွက်သော မိုင်းဆတ် - မိုင်းတုံ ကတ္တရာလမ်း အခြေအနေကို ကြည့်ရှုစစ်ဆေးပြီး တံတားဉီးစီးဌာန၊ တံတားအထူးအဖွဲ့(၁၂) တာဝန်ရှိသူက နမ့်စန်-မိုးနဲ-တာဆန်း-မိုင်းတုံ-မိုင်းဆတ်လမ်း ကီလိုမီတာ(၂၅၀ နှင့် ၂၅၁)ကြားရှိ တံတားဟောင်း ကျိုးကျပျက်စီးသွားသဖြင့် တစ်လမ်းမောင်း ဘေလီတံတား ယာယီအစားထိုး ဆောင်ရွက်ထားရှိမှု၊ နှစ်လမ်းမောင်း ကွန်ကရစ်တံတားသစ် တည်ဆောက်မည့် အခြေအနေတို့နှင့် ပတ်သက်၍ ရှင်းလင်းတင်ပြရာ လုပ်ငန်းလိုအပ်ချက်များ လမ်းညွှန်မှာကြားပြီး တံတားဟောင်း ကျိုးကျနေမှု၊ လက်ရှိ ယာယီဘေလီတံတား ကြံ့ခိုင်မှုနှင့် အသစ်တည်ဆောက်မည့် လျာထားနေရာတို့ကို ကြည့်ရှုစစ်ဆေးခဲ့ပါသည်။