ကချင်ပြည်နယ် အတွင်းရှိ လမ်း၊တံတားဖွံ့ဖြိုးတိုးတက်ရေး အတွက် လုပ်ငန်း ဆောင်ရွက်နေမှုနှင့် တိုးတက်မှု တို့ကို ကြည့်ရှုစစ်ဆေး

ဆောက်လုပ်ရေးဝန်ကြီးဌာန၊ ပြည်ထောင်စုဝန်ကြီး ဦးဟန်ဇော်၊ ဒုတိယဝန်ကြီး ဒေါက်တာ ကျော်လင်း နှင့်တာဝန်ရှိသူများသည် ယနေ့ မွန်းလွဲပိုင်းတွင် နေပြည်တော် ရှိ ဆောက်လုပ်ရေး ဝန်ကြီးဌာန ၊ အစည်းအ ဝေးခန်းမဆောင် မှ ကချင်ပြည်နယ် အတွင်းရှိ လမ်း ၊ တံတား နှင့် ကျေးလက်လမ်း လမ်း/တံတား ဖွံ့ဖြိုးရေး လုပ်ငန်းများ ဆောင်ရွက်နေမှုနှင့် လုပ်ငန်းတိုးတက်မှုတို့ကို စီမံကိန်းလုပ်ငန်းနေရာများနှင့် Video Conferencing ဖြင့် တိုက်ရိုက်ချိတ်ဆက်ကြည့်ရှုစစ်ဆေးပြီး တာဝန်ရှိသူများအား လုပ်ငန်း လိုအပ်ချက်များ မှာကြားသည်။

ရှေးဦးစွာ ကချင်ပြည်နယ် ၊ လမ်းဦးစီးဌာန ညွှန်ကြားရေးမှူး(မြို့ပြ) ဦးတင်မောင်အုန်း က ၂၀၁၉ - ၂၀၂၀ ဘဏ္ဍာရေးနှစ် မြစ်ကြီးနား - ဆွမ်ပရာဘွမ် - ပူတာအိုလမ်းတွင် လမ်းအထူးအဖွဲ့(၂)ဖွဲ့ ၊ တံတားအထူး အဖွဲ့(၁)ဖွဲ့ နှင့် ကုမ္ပဏီ(၁၄)ဖွဲ့တို့မှ ကွန်ကရစ်ခင်းခြင်း ၊ တံတားတည်ဆောက်ရေး လုပ်ငန်းများ ဆောင်ရွက် နေမှု ၊ မန္တလေး - လားရှိုး - ဗန်းမော် - မြစ်ကြီးနားလမ်းအပိုင်းတွင် ခရိုင် နှင့် ကုမ္ပဏီ(၅)ဖွဲ့ မှ Cement Stabilized ခင်းခြင်း ၊ AC ခင်းခြင်းလုပ်ငန်းများဆောင်ရွက်နေမှု ၊ နမ္မတီး - တနိုင်း - ပန်ဆောင်လမ်းတွင် မြစ်ကြီးနားခရိုင်မှ ကွန်ကရစ်ခင်းခြင်းလုပ်ငန်းနှင့် ကတ္တရာခင်းခြင်း လုပ်ငန်း ဆောင်ရွက်နေမှုနှင့် လုပ်ငန်း တိုးတက်မှု ၊ သဘာဝဘေးအန္တရာယ် ကြိုတင်ကာကွယ် ရေးအတွက် ပြင်ဆင်ဆောင်ရွက်ထားရှိမှု ၊ ကိုဗစ်-၁၉ နှင့်ပတ်သက်၍ လှူဒါန်း ထောက်ပံ့မှုတို့နှင့် စပ်လျဉ်း၍ Power Point ဖြင့် ရှင်းလင်းတင်ပြသည်။ ဆက်လက်၍ မြစ်ကြီးနား - ဆွမ်ပရာဘွမ် - ပူတာအိုလမ်းအပိုင်း လက်ရှိလုပ်ငန်းဆောင်ရွက်မှုနှင့် လုပ်ငန်း တိုးတက်မှု ၊ ကချင်ပြည်နယ် အတွင်းရှိ လမ်း ၊ တံတားလုပ်ငန်းများ ဆောင်ရွက်နေမှုနှင့် လုပ်ငန်းတိုးတက်မှု တို့ကို Video Clip ဖြင့် ပြသသည်။

ကချင်ပြည်နယ် လမ်းဦးစီးဌာနအနေဖြင့် လမ်းပမ်းဆက်သွယ်ရေးကဏ္ဍ ဖွံ့ဖြိုးတိုးတက်စေရေး အတွက် ကြိုးပမ်းဆောင်ရွက်လျက်ရှိရာ အဓိက အရေးပါသည့် မြစ်ကြီးနား - ဆွမ်ပရာဘွမ် - ပူတာအိုလမ်းတွင် လမ်းအထူးအဖွဲ့(၂)ဖွဲ့ ၊ တံတားအထူးအဖွဲ့(၁)ဖွဲ့ နှင့် ကုမ္ပဏီ(၁၄)ဖွဲ့တို့ပူးပေါင်း ဆောင်ရွက်မှုဖြင့် ယခုအခါ လုပ်ငန်းများ (၈၀ရာခိုင်နှုန်း) ပြီးစီးနေပြီ ဖြစ်သည်။

အလားတူ မန္တလေး - လားရှိုး - ဗန်းမော် - မြစ်ကြီးနားလမ်းအပိုင်းတွင် ခရိုင် နှင့် ကုမ္ပဏီ(၅)ဖွဲ့ တို့ဖြင့် ဆောင်ရွက် လျက်ရှိရာ ယခုအခါ လုပ်ငန်းများ (၈၅ရာခိုင်နှုန်း) ပြီးစီးနေပြီး ၊ နမ္မတီး - တနိုင်း - ပန်ဆောင် လမ်းသည် ယခုအခါ လုပ်ငန်းများ (၈၅ရာခိုင်နှုန်း) ပြီးစီးနေပြီဖြစ်ကြောင်း သိရသည်။

ဆက်လက်၍ ကချင်ပြည်နယ် ၊ ကျေးလက်လမ်းဖွံ့ဖြိုးရေးဦးစီးဌာန ၊ ညွှန်ကြားရေးမှူး(မြို့ပြ) ၊ ဦးမင်းဆွေက မိုးညှင်းမြို့နယ် ၊ နန့်မွန်း -ချောင်းဝ -ညောင်ပင်လမ်း (၁၆ ကီလိုမီတာ) နှင့် လယ်မှီး - ကွင်းကြီး - ဇီးကုန်း လမ်း ( ၂ဒသမ၆ ကီလိုမီတာ ) ကွန်ကရစ်ခင်းခြင်းလုပ်ငန်းများ ဆောင်ရွက်နေမှု ၊ ဝိုင်းမော်မြို့နယ်ရှိ ခတ်ချို - နောင်ပကပ် - ဇယ်ခမ်းလမ်း ( ၃ဒသမ၈ ကီလိုမီတာ) ၊ မုတ်လွဲ - ခတ်ချို - နောင်ဟီး - စန်းကား - တာစန်း ကျေးရွာချင်းဆက်လမ်း ( ၄ဒသမ၂ ကီလိုမီတာ) ၊ ဝါရှောင် - ဒိန်းဂျန်ယန် - ဂွေထုလမ်း( ၁ဒသမ၈၅ ကီလိုမီတာ ) ကွန်ကရစ်ခင်းခြင်းလုပ်ငန်း ဆောင်ရွက်နေမှု ကို လည်းကောင်း ၊ ယင်းနောက် မိုးကောင်း မြို့နယ်ရှိ ပွင့်ဖြူ - ထုံးရည်ပေါက်လမ်း (၂ဒသမ၆ ကီလိုမီတာ) ၊ အောက်ရှမ်းစုရွာလယ်လမ်း (၁ဒသမ၂ ကီလိုမီတာ ) ၊ ဆားမှော် - ထီးချိုင့် - တောင်နီလမ်း (၃ဒသမ၄ ကီလိုမီတာ ) ၊ နမ္မတီး - သူဌေးကုန်းလမ်း (၁ ကီလိုမီတာ) ၊ ပဲခူးစု - ဗန်းမော်ကုန်းလမ်း (၂ ကီလိုမီတာ) ၊ အောက်ရေရှင် - ညောင်ကုန်းလမ်း ( ၂ဒသမ၆ ကီလိုမီတာ ) ၊ ဆားမှော် - ပြွန်သုံးလုံးလမ်း (၄ဒသမ၄ ကီလိုမီတာ ) ကွန်ကရစ်ခင်းခြင်းလုပ်ငန်းများ ဆောင်ရွက် နေမှု အခြေအနေကိုလည်းကောင်း ၊ မံစီမြို့နယ်ရှိ ကျော်ခေါင် - မံဖွ ကျေးရွာချင်းဆက်လမ်း (၀.၆ ကီလိုမီတာ) ကွန်ကရစ်ခင်းခြင်းလုပ်ငန်း နှင့် ရွှေကူမြို့နယ်ရှိ တိန်းဟွန်း - ကုန်းနု - မဏိဩဂ - ဘိုကုန်း -သပြေလှ ကျေးရွာချင်းဆက်လမ်း (၇ဒသမ၂ ကီလိုမီတာ) အမာခံလမ်း တည်ဆောက်ခြင်း လုပ်ငန်း ဆောင်ရွက် နေမှု ၊ မြစ်ကြီးနားမြို့နယ်ရှိ လွယ်ခေါ - မလိခလမ်း (၁ဒသမ၆ ကီလိုမီတာ) ကွန်ကရစ်ခင်းခြင်း လုပ်ငန်းနှင့် ဗန်းမော်မြို့နယ်ရှိ စင့်ကင် - တိန်းသော် ကျေးရွာချင်းဆက်လမ်း ( ၂ဒသမ၈ ကီလိုမီတာ ) ကျောက် ချော ခင်းခြင်းလုပ်ငန်း ၊ ပူတာအိုမြို့နယ်ရှိ မာမူးလဲ့ - နမ်ဟော့ - လာဝါဒါးရွာလမ်း (၁ဒသမ၆ ကီလို မီတာ ) သဲကျောက်ခင်း ခြင်းလုပ်ငန်းနှင့် ဂျူဗလီ - မကပ်မုံလမ်း ( ၅ဒသမ၆ ကီလိုမီတာ ) ကျောက်ချော လမ်း ခင်းခြင်း လုပ်ငန်းများ ဆောင်ရွက်ထားရှိမှုတို့ကို Power Point ဖြင့် ရှင်းလင်းတင်ပြသည်။

ထို့နောက် ကချင်ပြည်နယ်အတွင်း Pilot Project အဖြစ် ဆောင်ရွက်လျက်ရှိသည့် လုပ်ငန်းများနှင့် တိုးတက်မှု အခြေအနေတို့ကို Video Clip ဖြင့် ပြသသည်။

ကချင်ပြည်နယ် ၊ ကျေးလက်လမ်းဖွံ့ဖြိုးရေးဦးစီးဌာန၏ ကြိုးပမ်းမှုဖြင့် ၂၀၁၈-၂၀၁၉ ဘဏ္ဍာရေး နှစ်တွင် ရာသီမရွေးသွားလာနိုင်သောလမ်း (၃၀ဒသမ၉၈ရာခိုင်နှုန်း) ခန့်သာရှိခဲ့ရာမှ ယခုအခါ ၂၀၁၉ - ၂၀၂၀ ဘဏ္ဍာရေးနှစ် ကုန်ဆုံးချိန်တွင် ရာသီမရွေးသွားလာနိုင်သောလမ်း (၃၁ဒသမ၅၀ရာခိုင်နှုန်း) အထိ တိုးတက် ဆောင်ရွက် ပြီးစီးမည်ဖြစ်သည့်အတွက် ကျေးလက်နေပြည်သူများ၏ လူမှုစီးပွားဘဝ ပိုမိုဖွံ့ဖြိုး တိုးတက် လာတော့မည် ဖြစ်ကြောင်း သိရသည်။

ထို့နောက် တံတားဦးစီးဌာန ၊ တံတားအထူးအဖွဲ့( ၁ ) မှ ဒုတိယညွှန်ကြားရေးမှူး ( မြို့ပြ ) ဦးစောဇာနည်လှ က ကချင်ပြည်နယ်အတွင်း “ မြစ်ကြီးနား - ဆွမ်ပရာဘွမ် - ပူတာအို ” လမ်းပေါ်ရှိ တံတား(၇)စင်းရှိ သည့်အနက် တည်ဆောက်ပြီး တံတား(၂)စင်း ၊ တည်ဆောက်ဆဲ တံတား(၃)စင်း ၊ တည်ဆောက်ရန် ကျန်ရှိ သည့် တံတား(၂)စင်း ကိုလည်းကောင်း ၊ “ မဂွေဇ - ခေါင်လန်ဖူး” လမ်းပေါ်ရှိ တံတား(၂)စင်းအနက် တည်ဆောက်ဆဲ တံတား(၁)စင်းနှင့် တည်ဆောက်ရန်ကျန်ရှိသည့် တံတား (၁)စင်း ကိုလည်းကောင်း ၊ “မချမ်းဘော့ - ဖရုခ - ရပ်ဘော့ - နောင်မွန်”လမ်းပေါ်ရှိ တံတား(၄)စင်း တည်ဆောက်ပြီးစီးမှု ကိုလည်း ကောင်း ၊ ဆက်လက်၍ “ မန္တလေး - လားရှိုး - ဗန်းမော် - မြစ်ကြီးနား” လမ်းပေါ်ရှိ တံတား(၄) စင်းအနက် တံတား(၁)စင်း တည်ဆောက်ပြီးစီးမှုနှင့် တံတား(၃)စင်း တည်ဆောက်ရန် ကျန်ရှိမှုတို့ကို Power Point ဖြင့် ရှင်းလင်းတင်ပြသည်။ ဆက်လက်၍ တံတား တည်ဆောက်ရေး လုပ်ငန်းများဆောင်ရွက်နေမှုနှင့် လုပ်ငန်း တိုးတက်မှုတို့ကို Video Clip ဖြင့် ပြသ သည်။

တင်ပြချက်များအပေါ် ပြည်ထောင်စုဝန်ကြီးနှင့် ဒုတိယဝန်ကြီးတို့က ကချင်ပြည်နယ်အတွင်း အဓိက လမ်းမကြီးဖြစ်သည့် မြစ်ကြီးနား - ဆွမ်ပရာဘွမ် - ပူတာအိုလမ်းသည် ယခင်က ဗွက်တန်းကြီး များဖြစ်ပြီး သွားလာရေးအလွန် ခက်ခဲပါကြောင်း ၊ ယခုအခါ အဆိုပါလမ်းပိုင်းကို ခရိုင်အဖွဲ့ ၊ အထူးအဖွဲ့များနှင့် ကုမ္ပဏီအဖွဲ့တို့၏ ပူးပေါင်းဆောင်ရွက်မှုကြောင့် တိုးတက်မှုများကို တွေ့မြင်ရသည့် အတွက် များစွာ အားရကျေနပ်မိပါကြောင်း ၊ လမ်းပမ်းဆက်သွယ်ရေးကောင်းမွန်မှ ဒေသဖွံ့ဖြိုး တိုးတက် လာမည် ဖြစ်ပါကြောင်း ၊ အဆိုပါ လမ်း ၊ တံတားများ အရည်အသွေးပြည့်မီစွာဖြင့် ကောင်းမွန်ရန် လိုပါကြောင်း ၊ လမ်းများ စတင်ဆောင်ရွက်စဉ်ကပင် လမ်းအင်္ဂါရပ်နှင့်အညီ စနစ်တကျ ဆောင်ရွက်ရန် လိုပါကြောင်း ၊ မိုးတွင်းကာလ လမ်းပမ်းဆက်သွယ်မှု မပြတ်တောက်စေရေး ၊ သဘာဝဘေးအန္တရာယ် ကြိုတင်ကာကွယ်မှု လုပ်ငန်းများ ဆောင်ရွက်ထားရှိရန် လိုပါကြောင်း ၊ ကျေးလက်နေပြည်သူများ သွားလာရေး လွယ်ကူ အဆင်ပြေစေရန် ကျေးလက်လမ်း ၊ တံတားများ တိုးတက် ကောင်းမွန်အောင် ဆောင်ရွက်ရန်လိုကြောင်း ၊ ဆက်လက်၍လည်း လုပ်ငန်းများတိုးတက်အောင် ကြိုးစားဆောင်ရွက် စေလိုပါကြောင်း မှာကြားခဲ့ပါသည်။